धादिङमा वर्षाको वितण्डा, पृथ्वी राजमार्गका सात ठाउँमा पहिरो

धादिङमा लगातार भइरहेको वर्षाले पृथ्वी राजमार्गका विभिन्न भागमा पहिरो खस्दा यातायात सेवा प्रभावित भएको छ। राजमार्गअन्तर्गत सात स्थानमा पहिरो खसेको जिल्ला प्रहरी कार्यालय धादिङले जनाएको छ।

प्रहरीका अनुसार कृष्णभिर, परेवाभिर, ज्यामिरेघाट, जहरे, जवाङखोला, तिगराङ खोला र कमेरेभिर क्षेत्रमा पहिरो गएको हो। तीमध्ये कृष्णभिर र तिगराङ खोलामा सडक दुवैतर्फबाट बन्द भएको छ भने अन्य स्थानमा एकतर्फी रूपमा सवारी सञ्चालन भइरहेको छ।

कृष्णभिर क्षेत्रमा पहिरो हटाउन दुईवटा उपकरण परिचालन गरिएको छ। तर वर्षा नरोकिँदा र कतिपय ठाउँमा लगातार पहिरो झरिरहेकाले सडक खुलाउने काममा कठिनाइ भइरहेको प्रहरीले जनाएको छ।

राजमार्गमा आवतजावत गर्ने सवारीसाधन लामो समय रोकिन सक्ने भएकाले यात्रुहरूलाई सडकको पछिल्लो अवस्था बुझेर मात्र यात्रा गर्न आग्रह गरिएको छ। वर्षा जारी रहेकाले पहिरोको जोखिम थप बढ्न सक्ने भन्दै चालकहरूलाई विशेष सावधानी अपनाउनसमेत अनुरोध गरिएको छ।

पृथ्वी राजमार्ग राजधानी काठमाडौंलाई देशका विभिन्न जिल्लासँग जोड्ने प्रमुख सडक भएकाले यहाँको अवरोधले लामो दूरीका यात्रु तथा मालवाहक सवारीसाधनमा समेत प्रत्यक्ष असर पार्न सक्छ।