राप्रपामा रूपान्तरण र पुस्तान्तरणको बहस चर्काउँदै ज्ञानेन्द्र शाही

काठमाडौं — राष्ट्रिय प्रजातन्त्र पार्टी (राप्रपा) ले देशभर जिल्ला अधिवेशनमार्फत नयाँ नेतृत्व चयनको प्रक्रिया अघि बढाइरहेका बेला पार्टीभित्र नेतृत्व परिवर्तन, पुस्तान्तरण र संगठनात्मक रूपान्तरणको बहस पनि तीव्र भएको छ। यही सन्दर्भमा राप्रपाका संसदीय दलका नेता तथा प्रवक्ता ज्ञानेन्द्र शाहीले पार्टीले समयअनुसार आफूलाई परिवर्तन गर्न नसके जनतासँगको सम्बन्ध कमजोर हुन सक्ने धारणा राखेका छन्।

मंगलबारसम्म राप्रपाले ६३ जिल्लामा अधिवेशन सम्पन्न गरिसकेको थियो। कैलालीमा आयोजित जिल्ला अधिवेशनको उद्घाटन कार्यक्रममा पार्टी अध्यक्ष राजेन्द्र लिङ्देनसहित शाही पनि सहभागी थिए। सोही कार्यक्रममा शाहीले राप्रपाको आगामी महाधिवेशनलाई केवल पदाधिकारी चयन गर्ने प्रक्रियाका रूपमा मात्र नहेर्न आग्रह गरे।

शाहीले पार्टीभित्र रूपान्तरण र पुस्तान्तरण आवश्यक रहेकोमा जोड दिए। उनका अनुसार नेतृत्वमा नयाँ पुस्ताको सहभागिता र संगठनमा समयअनुकूल परिवर्तन हुन नसके पार्टीको संरचना कायम रहे पनि जनताको विश्वास कायम राख्न कठिन हुन सक्छ। उनले पार्टीमा अध्यक्ष, वरिष्ठ उपाध्यक्ष तथा अन्य पदहरू कायम रहन सक्ने भए पनि जनसमर्थन गुमेपछि संगठनको राजनीतिक प्रभाव कमजोर हुने तर्क गरेका छन्।

नयाँ पुस्ताको सहभागितालाई जोड

शाहीले आफ्नो भनाइ राख्ने क्रममा पछिल्लो राजनीतिक परिदृश्यमा युवा पुस्ताको सहभागिता बढिरहेको उदाहरणसमेत प्रस्तुत गरेका थिए। उनले ३५ वर्षका बालेन्द्र शाह प्रधानमन्त्री बनेको र नेपाली कांग्रेसमा पनि नेतृत्व नयाँ पुस्तातर्फ सरेको प्रसंग उल्लेख गर्दै राप्रपाभित्र पनि पुस्तान्तरणको विषयलाई गम्भीर रूपमा लिनुपर्ने धारणा राखे।

राप्रपाको आगामी नेतृत्वलाई लिएर अध्यक्ष राजेन्द्र लिङ्देन र शाहीबीच प्रतिस्पर्धा हुन सक्ने चर्चा पनि भइरहेको छ। लिङ्देन पुनः एक कार्यकाल अध्यक्ष बन्ने तयारीमा रहेको अवस्थामा शाहीले भने पार्टीको नेतृत्व र संगठनलाई नयाँ ढंगले अघि बढाउनुपर्ने विषय उठाएका छन्।

जिल्ला अधिवेशनमा गुटबन्दीप्रति चिन्ता

शाहीले आफू धेरै जिल्ला अधिवेशनमा सहभागी नभएको विषयमा पनि स्पष्टीकरण दिएका छन्। उनका अनुसार जिल्ला अधिवेशनमा प्रत्यक्ष सहभागी हुँदा गुट र उपगुट निर्माण हुने अवस्था आउन सक्ने भएकाले आफू त्यस्ता गतिविधिबाट टाढा बसेको उनको भनाइ छ।

उनले आगामी महाधिवेशनमा नेतृत्व चयनसँगै पार्टीको नीति, संगठन र राजनीतिक दिशाबारे पनि स्पष्ट निर्णय आवश्यक रहेको बताएका छन्। उनका अनुसार आगामी निर्वाचनमा पार्टीले कुन रणनीति अपनाउने भन्ने विषय अहिले नै स्पष्ट हुनुपर्ने आवश्यकता छ।

पार्टीको राजनीतिक नीतिमाथि प्रश्न

शाहीले राप्रपाको वर्तमान राजनीतिक व्यवहारमा एकरूपता नरहेको आरोप पनि लगाएका छन्। उनले नेकपा एमालेको आलोचना गर्ने तर आवश्यकताअनुसार त्यही दलसँग चुनावी सहकार्य गर्ने, प्रदेश संरचनाको विरोध गर्ने तर प्रदेश निर्वाचनमा सहभागी हुनेजस्ता विषयलाई उदाहरणका रूपमा प्रस्तुत गरे।

उनले विभिन्न प्रदेशमा राप्रपाले फरक–फरक राजनीतिक भूमिकामा देखिएको भन्दै पार्टीको नीति सबै ठाउँमा समान हुनुपर्ने धारणा राखे। पार्टीले कुन राजनीतिक बाटो रोज्ने भन्ने विषयमा स्पष्टता आवश्यक रहेको उनको भनाइ थियो।

महाधिवेशनलाई निर्णायक अवसरका रूपमा हेर्नुपर्ने

शाहीका अनुसार आगामी महाधिवेशन केवल नयाँ पदाधिकारी चयन गर्ने प्रक्रिया नभई राप्रपालाई राष्ट्रिय राजनीतिक शक्तिका रूपमा स्थापित गर्ने अवसर पनि हुनुपर्छ। संगठन विस्तार, स्पष्ट राजनीतिक नीति र नयाँ पुस्ताको सहभागितामार्फत पार्टीलाई बलियो बनाउने विषयमा महाधिवेशनले निर्णय गर्नुपर्ने उनले बताएका छन्।

यता अध्यक्ष लिङ्देनले भने आफ्नो नेतृत्वमा राप्रपाले विगतको तुलनामा संगठनात्मक तथा संसदीय उपस्थितिमा विस्तार गरेको बताएका छन्। उनले आफू अध्यक्ष हुँदा पार्टी राष्ट्रिय पार्टीसमेत नरहेको र त्यसपछि विभिन्न नेताहरूको सहभागितासँगै प्रतिनिधिसभामा राप्रपाको उपस्थिति बढेको उल्लेख गरेका छन्।

लिङ्देनले पार्टीलाई देशका समस्या समाधान गर्न सक्ने बलियो विचार र दर्शनमा आधारित राजनीतिक शक्तिका रूपमा विकास गर्ने प्रयास भइरहेको बताएका छन्। यससँगै पार्टीभित्र देखिएका नेतृत्व र नीतिसम्बन्धी बहसलाई आगामी महाधिवेशनले कुन दिशामा लैजान्छ भन्ने विषय महत्वपूर्ण बनेको छ।