ओमानविरुद्ध नेपाल १४७ रनमा सीमित

काठमाडौं । मलेसियामा जारी एसीसी प्रिमियर कपको सेमिफाइनल खेलमा नेपालले ओमानविरुद्ध कमजोर ब्याटिङ प्रदर्शन गर्दै १४७ रनमा सबै विकेट गुमाएको छ। टस हारेर पहिले ब्याटिङको निम्तो पाएको नेपालले ४५.४ ओभरमा आफ्नो सम्पूर्ण विकेट गुमाएको हो।

नेपालको सुरुवात नै अपेक्षाअनुसार हुन सकेन। टोलीले २३ रनको स्कोरमा पहिलो विकेट गुमाएपछि लगातार विकेट गुमाउँदै ३६ रनमै चार विकेट गुमाएको थियो। यस्तो कठिन अवस्थामा पुगेको नेपाली टोलीलाई मध्यक्रमका ब्याटर दीपेन्द्रसिंह ऐरी र बसिर अहमदले केही समय सम्हाले।

दीपेन्द्र र बसिरले पाँचौँ विकेटका लागि ९३ रनको महत्वपूर्ण साझेदारी गर्दै नेपालको इनिङ्सलाई केही हदसम्म उकासे। यो साझेदारीले नेपाललाई अत्यन्त न्यून स्कोरमा समेटिनबाट जोगाए पनि अन्तिम चरणमा थप रन जोड्न नेपाली ब्याटर असफल भए।

दीपेन्द्रसिंह ऐरी नेपालको तर्फबाट सर्वाधिक रन बनाउने खेलाडी बने। उनले ५१ रनको योगदान दिए। बसिर अहमदले ४७ रन बनाए। यी दुईबाहेक देव खनालले १३ तथा आसिफ शेखले ११ रन जोडे। अन्य ब्याटरले दोहोरो अंकको स्कोर बनाउन सकेनन्।

ओमानका बलरहरूले नेपाली ब्याटिङमाथि सुरुदेखि नै दबाब कायम राखे। जय ओडेडराले १० ओभरमा २६ रन खर्चेर तीन विकेट लिए भने हस्नैन शाहले ८.४ ओभरमा २८ रन दिँदै तीन विकेट हात पारे।

त्यस्तै मुहम्मद इमरानले दुई विकेट लिए। शकील अहमद र मुजिबुर अलीले पनि एक–एक नेपाली ब्याटरलाई पभेलियन फर्काए। ओमानका बलरहरूले नियमित अन्तरालमा विकेट निकाल्दा नेपाल ठूलो स्कोरतर्फ जान सकेन।

नेपालले ३६ रनमा चार विकेट गुमाएपछि ऐरी र बसिरको साझेदारीमा १२९ रनसम्म पुग्न सफल भएको थियो। तर त्यसपछि बाँकी ब्याटरले लामो साझेदारी गर्न नसक्दा टोली १४७ रनमै समेटियो।

अब ओमानलाई जितका लागि १४८ रनको लक्ष्य पछ्याउनुपर्नेछ। नेपालको बलिङ आक्रमणले ओमानलाई रोक्दै खेलमा पुनरागमन गराउनुपर्ने चुनौती छ।