पूर्वराजा ज्ञानेन्द्रसँग धवल शम्शेरको भेट, के भयो छलफल?

जय नेपाल पार्टीका सभापति धवल शम्शेर राणाले पूर्वराजा ज्ञानेन्द्र शाहसँग काठमाडौंस्थित सोल्टी होटलमा करिब दुई घन्टा लामो भेटवार्ता गरेका छन्। हिमानी ट्रस्टले आयोजना गरेको कार्यक्रममा सहभागी हुने क्रममा राणा र पूर्वराजा शाहबीच छुट्टै ‘वान टू वान’ कुराकानी भएको बताइएको छ।

भेटवार्तामा पछिल्लो राजनीतिक तथा सामाजिक अवस्था, नयाँ राजनीतिक दलको गठन र त्यसको उद्देश्यलगायत विषयमा छलफल भएको राणाले बताएका छन्। उनले आफूले जय नेपाल पार्टी गठन गरेको विषय पूर्वराजालाई जानकारी गराएको र पार्टीको आगामी राजनीतिक यात्राबारे पनि कुराकानी भएको बताएका छन्।

राणाका अनुसार पूर्वराजा शाहले नयाँ पार्टी गठन भएकोमा शुभकामना दिँदै सबैलाई समेटेर अघि बढ्न सुझाव दिएका थिए। छलफलका क्रममा पूर्वराजा सकारात्मक रूपमा प्रस्तुत भएको राणाको भनाइ छ।

जय नेपाल पार्टीले आफ्नो राजनीतिक कार्यदिशाका रूपमा राजसंस्था र हिन्दु राष्ट्रका पक्षमा जनमत निर्माण गर्ने लक्ष्य अघि सारेको छ। राणाले पार्टीको पहिलो केन्द्रीय समिति बैठक सम्पन्न भइसकेको र अब यी मुद्दालाई लिएर देशव्यापी रूपमा जनमत निर्माण गर्ने तयारी भइरहेको जानकारी पनि दिएका छन्।

भेटमा आगामी स्थानीय तथा प्रदेश निर्वाचनमा सहभागी हुने विषय पनि उठेको बताइएको छ। राणाका अनुसार पार्टीले स्थानीय तहलाई प्रभावकारी बनाउने उद्देश्यसहित योग्य, शिक्षित र नयाँ सोच भएका व्यक्तिहरूलाई उम्मेदवारका रूपमा अघि बढाउने तयारी गरिरहेको छ।

पूर्वराजासँगको यो भेटलाई जय नेपाल पार्टीको नयाँ राजनीतिक यात्राको सुरुवाती चरणमा भएको महत्वपूर्ण संवादका रूपमा हेरिएको छ। यद्यपि भेटवार्ताबाट कुनै औपचारिक राजनीतिक सहमति वा सहकार्य घोषणा गरिएको छैन। हालका लागि छलफल राजनीतिक अवस्था, पार्टीको उद्देश्य र आगामी गतिविधिबारे विचार आदानप्रदानमा केन्द्रित रहेको देखिन्छ।