गाडीबाट झरेकी आमा–छोरीलाई अर्को गाडीले ठक्कर दिँदा दुवैको मृत्यु

रुकुम पश्चिममा भएको दर्दनाक सवारी दुर्घटनामा आमा–छोरीको ज्यान गएको छ। आइतबार बिहान सानीभेरी गाउँपालिका–८ एकान्तस्थित मध्यपहाडी सडकखण्डमा यात्रुबाहक गाडीबाट ओर्लिएका आमा–छोरीलाई अर्को गाडीले ठक्कर दिँदा उनीहरूको मृत्यु भएको हो।

गुल्मीको रुरुक्षेत्र गाउँपालिका–४ बलेटक्चाकाकी २६ वर्षीया स्वस्तिका पौडेल र उनकी दुई वर्षीया छोरी शान्दिका ज्ञावली रुकुम पश्चिमबाट सुर्खेतस्थित घरतर्फ जाँदै थिए। उनीहरू क.प्र.०२–००१ ख १०७० नम्बरको यात्रुबाहक गाडीमा सवार थिए। यात्राका क्रममा छोरीले शौच गर्नुपर्ने बताएपछि स्वस्तिकाले गाडी रोक्न लगाएकी थिइन्। त्यसपछि उनी छोरीलाई लिएर सडकमा झरेकी थिइन्।

सोही क्रममा सिम्लीबाट चौरजहारीतर्फ जाँदै गरेको भे.१ ज १४८२ नम्बरको अर्को गाडीले सडकमा रहेकी आमा–छोरीलाई ठक्कर दिएको प्रहरीले जनाएको छ। दुर्घटनापछि गम्भीर घाइते भएका दुवैलाई तत्काल उद्धार गरी सानीभेरी गाउँपालिकाको एम्बुलेन्समार्फत जिल्ला अस्पताल सल्ले पुर्‍याइएको थियो। तर चिकित्सकले बिहान साढे ९ बजेतिर दुवैलाई मृत घोषणा गरेका थिए।

ठक्कर दिने गाडीका चालक सानीभेरी गाउँपालिका–३ चौखेका २२ वर्षीय अम्मर विकलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको जिल्ला प्रहरी कार्यालय रुकुम पश्चिमले जनाएको छ।

स्वस्तिका आफ्ना श्रीमान् घनश्याम ज्ञावलीलाई भेट्न छोरीसहित रुकुम पश्चिमको सदरमुकाम मुसिकोट खलंगा पुगेकी थिइन्। उनी सनराइज बैंकमा कार्यरत श्रीमान्लाई भेटेर छोरीसहित गुल्मीस्थित घर फर्किने क्रममा थिइन्। तर घर पुग्नुअघि नै भएको दुर्घटनाले आमा–छोरी दुवैको ज्यान लिएको छ।

घटनाले सडकमा यात्रुहरू गाडीबाट ओर्लिँदा र सडक पार गर्दा अपनाउनुपर्ने सावधानी तथा चालकहरूले सवारी चलाउँदा देखाउनुपर्ने सतर्कताको महत्त्वलाई पुनः उजागर गरेको छ।