एनभिडिया सीईओ जेन्सेन ह्वाङले एआईसम्बन्धी बढ्दो डरप्रति असहमति जनाए

काठमाडौं — एनभिडियाका प्रमुख कार्यकारी अधिकृत (सीईओ) जेन्सेन ह्वाङले एआईका कारण मानव जीवन र रोजगारीमा ठूलो क्षति पुग्ने भन्दै बढिरहेको डरप्रति असहमति जनाएका छन्।

ह्वाङका अनुसार एआईलाई लिएर देखाइँदै आएको अत्यधिक डर वास्तविक जोखिमभन्दा पनि साइबर सुरक्षा व्यवसायका लागि नयाँ बजार र माग सिर्जना गर्ने प्रयाससँग जोडिएको हुन सक्छ।

उनले एआईका कारण मानवताको अन्त्य हुने वा ठूलो संख्यामा रोजगारी समाप्त हुनेजस्ता दाबीलाई अतिरञ्जित धारणा भएको बताएका छन्।

एआईको विकाससँगै साइबर सुरक्षा र डेटा सुरक्षाको आवश्यकता भने बढिरहेको छ। एआई प्रणालीको व्यापक प्रयोगले नयाँ प्रकारका सुरक्षा चुनौती ल्याउन सक्ने भएकाले कम्पनीहरूले आफ्ना प्रणाली सुरक्षित बनाउन थप लगानी गर्नुपर्ने अवस्था पनि देखिएको छ।

ह्वाङ एआईको विकासलाई केवल जोखिमका रूपमा नभई नयाँ प्रविधि, व्यवसाय र रोजगारीका अवसर सिर्जना गर्ने माध्यमका रूपमा हेर्नुपर्ने पक्षमा छन्। उनका अनुसार एआईको प्रभावबारे चर्चा गर्दा सम्भावित जोखिमसँगै यसले ल्याउन सक्ने सकारात्मक परिवर्तनलाई पनि ध्यान दिन आवश्यक छ।