३५ वर्षपछि बङ्गलादेशमा राष्ट्रपति चुनाव, सत्तारुढ उम्मेदवार बलियो

ढाका । बङ्गलादेशमा ३५ वर्षपछि पहिलोपटक प्रतिस्पर्धात्मक राष्ट्रपतीय निर्वाचन हुँदैछ। आज संसद् भवनमा सांसदहरूले राष्ट्रपतिको चयनका लागि मतदान गर्दैछन्। सन् १९९१ पछि पहिलोपटक राष्ट्रपतिको निर्वाचनमा दुई उम्मेदवारबीच प्रतिस्पर्धा हुन लागेको हो।

सत्तारुढ बङ्गलादेश नेसनलिस्ट पार्टी (बीएनपी)का उम्मेदवार मिर्जा फखरुल इस्लाम आलमगीर र जमात–ए–इस्लामी नेतृत्वको ११ दलीय विपक्षी गठबन्धनका उम्मेदवार अवकाशप्राप्त सैनिक अधिकारी ओली अहमदबीच प्रतिस्पर्धा हुँदैछ। निर्वाचनमा संसद्का ३४९ सदस्य मतदानका लागि योग्य छन्।

संसद्मा सत्तारुढ बीएनपीको २४७ सांसद रहेकोले आलमगीरको जित लगभग निश्चितजस्तै देखिएको छ। विपक्षी गठबन्धनसँग ९० सांसद रहेका छन्। त्यसैले प्रतिस्पर्धा औपचारिक भए पनि परिणाम सत्तारुढ दलकै उम्मेदवारको पक्षमा जाने अपेक्षा गरिएको छ।

यसपटकको निर्वाचन राष्ट्रपतिको पद खाली भएपछि हुन लागेको हो। तत्कालीन राष्ट्रपति मोहम्मद शाहाबुद्दिनले गत महिना पदबाट राजीनामा दिएपछि नयाँ राष्ट्रपति चयनको प्रक्रिया अघि बढाइएको हो। उनी सन् २०२३ मा निर्विरोध निर्वाचित भएका थिए।

निर्वाचन आयोगका अनुसार मतदान आज दिउँसो २ बजेदेखि ५ बजेसम्म संसद्को बैठक कक्षमा हुनेछ। नवनिर्वाचित राष्ट्रपतिको शपथ शुक्रबार साँझ गराउने तयारी गरिएको छ।

३५ वर्षपछि प्रतिस्पर्धात्मक राष्ट्रपतीय निर्वाचन हुनुले बङ्गलादेशको पछिल्लो राजनीतिक परिवर्तनबीच विशेष महत्व राखेको छ। यद्यपि संसद्मा सत्तारुढ दलको स्पष्ट बहुमत भएकाले निर्वाचनको परिणामप्रति धेरै अनिश्चितता नरहेको विश्लेषण गरिएको छ।