अन्डा किन्ने उपभोक्तालाई झट्का, फेरि बढ्यो बजार मूल्य

काठमाडौं । नेपाली बजारमा अन्डाको मूल्य फेरि बढेको छ। नेपाल लेयर्स कुखुरापालक संघले बिहीबारदेखि लागू हुने गरी अन्डाको नयाँ समर्थन बिक्री मूल्य तोकेसँगै उपभोक्ताले थप महँगोमा अन्डा किन्नुपर्ने भएको छ।

नयाँ मूल्यअनुसार एक्सएल अन्डाको मूल्य प्रतिक्रेट ५९० रुपैयाँ, ठूलो अन्डाको ५७५ रुपैयाँ र मिडियम अन्डाको ५३५ रुपैयाँ पुगेको छ। सानो अन्डाको मूल्य भने प्रतिपेटी ३ हजार २ सय रुपैयाँ कायम गरिएको छ।

संघले यसपटक प्रतिक्रेट १५ रुपैयाँले मूल्य बढाएको हो। यसअघि ३० साउनदेखि लागू हुने गरी एक्सएल अन्डाको मूल्य ५७५ रुपैयाँ, ठूलो अन्डा ५६० रुपैयाँ र मिडियम अन्डा ५२० रुपैयाँ तोकिएको थियो। अर्थात् एक साता नबित्दै अन्डाको मूल्य पुनः बढेको हो।

साउन महिनामै अन्डाको समर्थन मूल्य चार पटक वृद्धि गरिएको थियो। साउनको सुरुवातमा एक्सएल अन्डाको मूल्य प्रतिक्रेट ५२५ रुपैयाँ रहेकामा महिनाको अन्त्यसम्म आइपुग्दा ५७५ रुपैयाँ पुगेको थियो। भदौ लागेसँगै थप १५ रुपैयाँ वृद्धि भएर ५९० रुपैयाँ पुगेको हो।

अन्डाको मूल्य लगातार बढ्दै जाँदा यसको प्रत्यक्ष असर उपभोक्ताको दैनिक खर्चमा पर्ने देखिन्छ। विशेषगरी होटल, रेस्टुरेन्ट तथा बेकरी व्यवसायमा अन्डा ठूलो मात्रामा प्रयोग हुने भएकाले मूल्यवृद्धिले उनीहरूको लागतसमेत बढाउन सक्छ।

अन्डा नेपाली उपभोक्ताको नियमित खाद्य पदार्थमध्ये एक भएकाले मूल्यमा आएको निरन्तर वृद्धिले बजारमा चासो बढाएको छ। आगामी दिनमा उत्पादन, माग र आपूर्तिको अवस्थाले अन्डाको मूल्य थप बढ्ने वा स्थिर हुने भन्ने निर्धारण गर्नेछ।